• یه‌كێتی هه‌ڕه‌شه‌ له‌ حزبه‌كانی سلێمانی ده‌كات

  • سێ هێزی هاوبه‌ش ناوچه‌ كوردستانیه‌كان به‌ڕێوه‌ ده‌به‌ن

  • یه‌كێتی هه‌وڵده‌دات كۆبونه‌وه‌ی په‌رله‌مان ئه‌نجامنه‌درێ

  • یه‌كێتی هانا بۆ سه‌رۆك بارزانی ده‌بات

  • گۆڕان داوای جێگری سێ پۆسته‌ سیادیه‌كه‌ ده‌كات

یه‌كێتی هه‌ڕه‌شه‌ له‌ حزبه‌كانی سلێمانی ده‌كات


یەکێتیی نیشتمانیی کوردستان، بە مەبەستی ڕێگریکردن و پەکخستنی دانیشتنەکەی ڕۆژی ١٨ی شوباتی پەرلەمانی کوردستان، هەڕەشە لە حزبەکانی سلێمانی دەکات و دوور نییە ڕووداوی هێرشکردنە سەر گردی زەرگەتە کە لە ١٢ی ٥ی ٢٠١٨ ڕووی دا، جارێکی دیکە دووبارە ببێتەوە.

میدیاکانی یەکێتی لە زاری لەتیف شێخ عومه‌ر، ئه‌ندامی ئەنجومەنی سه‌ركردایه‌تیی یه‌كێتییەوە کە کراوە بە گوتەبێژی فەرمیی حزبەکەش، بڵاویان کردەوە، هێشتا یەکێتی پێیوایە کە بەغدا و کەرکووک و هەرێمی کوردستان یەک پاکێجن و بەبێ ئەو مەرجە، بەشداری لە کۆبوونەوەی ١٨ی شوباتی پەرلەماندا ناکەن.

هاوکات لەگەڵ ئەو لێدوانە، بەشێک لە میدیاکانی یەکێتی، بەتایبەتیش میدیای نزیک لە لاهوور جەنگی، بڵاویان کردەوە کە ”بەبێ یەکێتی هیچ حزبێکی تری ناوچەی سەوز بەشداری لە دانیشتنی پەرلەماندا ناکات“. ئەمەش لە لای چاودێرانەوە بە هەڕەشەیەک بۆ سەر حزبەکانی سلێمانی لێک درایەوە.

بەپێی زانیارییەکان بەرپرسانی بزووتنەوەی گۆڕان ترسی ئەوەیان هەیە کە جارێکی دیکە ڕووداوەکەی ١٢ی ئایاری ٢٠١٨ دووبارە ببێتەوە کە هێزێکی سەر بە یەکێتی بە چەکی قورس و سووک پەلاماری گردی زەرگەتەیان دا و تەنانەت ژوورێکی کۆبوونەوەی چەند حزبێکیان کردە ئامانج.

 

زیاتر بخوێنەوە

سێ هێزی هاوبه‌ش ناوچه‌ كوردستانیه‌كان به‌ڕێوه‌ ده‌به‌ن


بەرپرسێكی پارتی دەڵێ، ھەوڵەكان بۆ ئاساییكردنەوەی ناوچە كوردستانییەكانی سنووری ماددەی ١٤٠ی دەستووری عێراق بەردەوامن، بەڵام نەگەیشتووینەتە رێككەوتنی كۆتایی و پێشمەرگەش دەگەڕێتەوە ئەو ناوچانە.

دیاری حوسێن، جێگری بەرپرسی ئەنجوومەنی سەركردایەتیی كەركووك_ گەرمیانی پارتی ئاشكرای كرد: "بەپێی رێككەوتنی نێوان ھەرێمی كوردستان و بەغدا، رەوشی ناوچە كوردستانییەكانی دەرەوەی ئیدارەی حكوومەتی ھەرێمی كوردستان ھەر لە خانەقینەوە تا شنگال ئاسایی دەكرێتەوە، واتە ھێزی پێشمەرگە دەگەڕێتەوە ئەو ناوچانە و ھەماھەنگی لە نێوان سوپا و پێشمەرگەدا دەبێت، بێگومان چەند بنكەیەكی ئەمەریكایش لەو سنوورانە جێگیر كراون".

دوێنێ شاندێكی وەزارەتی پێشمەرگە سەردانی شاری كەركووكی كرد و بڕیارە لە چوارچێوەی ئاساییكردنەوەی رەوشی ناوچە كێشەلەسەرەكان، چەند یەكەیەكی سوپای عێراق و پێشمەرگە جێگیر بكرێن، بەرپرسەكەی پارتی، بۆ ماڵپەڕی فەرمیی پارتی دیموكراتی كوردستان گوتیشی: "پاراستنی ئەو ناوچانە سێلایەنە دەبێت، وەك بەر لە ساڵی ٢٠١٤، چونكە دوای پڕۆسەی ئازادیی عێراق ھەماھەنگی ھەبوو لە نێوان پێشمەرگە و ئەمەریكا و عێراق، بۆیە دیسان ئەو ھەماھەنگییە دروست دەبێتەوە و نابێت لەو سنوورانەدا هیچ ھێزێك بە بێ ئاگاداری و ھەماھەنگی، جووڵە بكات".

 

زیاتر بخوێنەوە

یه‌كێتی هه‌وڵده‌دات كۆبونه‌وه‌ی په‌رله‌مان ئه‌نجامنه‌درێ


ئەندامێكی سەركردایەتیی یەكێتی ئاشكرای دەكات، ئەمڕۆ گفتوگۆكان لەبارەی پێكھێنانی حكوومەت بەردەوام دەبن و حزبەكەی ھەوڵ دەدات كۆبوونەوەی سبەی پەرلەمان دوابخرێت.

بڵێسە جەبار فەرمان، ئەندامی سەركردایەتیی یەكێتیی نیشتمانیی كوردستان بە كوردستان24 راگەیاند: "ئەمڕۆ گفتوگۆكان بەردەوام دەبن و ھەوڵ دەدەین كۆبوونەوەكەی پەرلەمان دوابخرێت، بۆ ئەوەی ئەو رەشنووسەی لەلایەن یەكێتییەوە پێشكەش بە پارتی كراوە رێككەوتنی لەسەر بكرێت، دواتر كۆبوونەوەی پەرلەمان بكرێت".

گوتیشی: "كێشەی سەرەكیمان لەگەڵ پارتی لەسەر كەركووكە، ئێمە پێمان باشە ھەموو كێشەكان بە یەك پاكێج رێككەوتنیان لەسەر بكرێت، به‌ڵام بۆچوونی پارتی لەسەر ئەو بابەتە جیاوازە".


 

 

زیاتر بخوێنەوە

یه‌كێتی هانا بۆ سه‌رۆك بارزانی ده‌بات


شاندێکی باڵای یەکێتیی نیشتمانیی کوردستان بە سەرپەرشتیی جێگری یەکەمی سکرتێری گشتیی حزبەکە، سەردانی سەرۆک بارزانی دەکەن.

بەپێی زانیارییەکان بڕیارە ئێوارەی ئەمڕۆ یەکشەممە ١٧ی ٢ی ٢٠١٩، شاندێکی باڵای یەکێتی کە کۆسرەت ڕەسووڵ سەرۆکایەتی دەکات، سەردانی سەرۆک بارزانی بکەن و دوا بڕیاریان بۆ بەشداریکردن لە کۆبوونەوەکەی سبەی پەرلەمانی کوردستان لەو کۆبوونەوەیەدا بدەن.

لەمبارەیەوە لەتیف شێخ عومەر، گوتەبێژی فەرمیی یەکێتیی نیشتمانیی کوردستان، بە ئاژانسی باسنیوزی ڕاگەیاندوه‌: ”جارێ ئەو سەردانەی وەفدی یەکێتی بۆ لای بارزانی، نەچەسپیوە و کەمێکی دیکە تاوتوێی سەردانەکە دەکەن".

بە گوتەی ناوبراو، ھەڵوێستی یەکێتی هێشتا ئەوەیە کە کۆبوونەوەی پەرلەمان بەندە بە بابەتی کەرکووک و بەغدا هەروەک لە ڕاگەیاندراوی ئەنجومەنی سەرکردایەتیی یەکێتیدا ئاماژەی پێ دراوە.

 

زیاتر بخوێنەوە

گۆڕان داوای جێگری سێ پۆسته‌ سیادیه‌كه‌ ده‌كات


سەرکردەیەکی بزووتنەوەی گۆڕان نەیشاردەوە کە هێشتا ئەوان چاویان لەسەر پۆستی جێگری سەرۆکی حکوومەتی هەرێمی کوردستانە و ”بە لامانەوە گرنگە“.

شاخەوان ڕەووف بەگ، ئەندامی فراکسیۆنی گۆڕان لە پەرلەمانی کوردستان، ڕایگەیاند: "ھەرچەندە پۆستە سیادییەکان یەکلایی نەکراوەتەوە، بەڵام ئێمە لەو سێ پۆستە سیادییە و دەستەی سەرۆکایەتییەکان، پۆستی جێگری سەرۆکی حکوومەتی ھەرێمی کوردستان بەلای ئێمەوە گرنگە، چونکە ئەو پۆستە بواری کارکردنی تێدایە، دەتوانین بەهۆیەوە خزمەتی خەڵکی بکەین".

ڕوونیشی کردەوە، پۆستی جێگری سەرۆکی حکوومەت و پۆستی جێگری سەرۆکی پەرلەمان و جێگری سەرۆکی ھەرێم، ”بە گرنگ دەزانین و داوای ئەو پۆستانەمان کردووە و جەختمان لێ کردوونەتەوە، بەڵام زیاتر بەلای ئێمەوە پۆستی جێگری سەرۆکی پەرلەمان و جێگری سەرۆکی حکوومەت گرنگە".

 

زیاتر بخوێنەوە
Previous
داهاتوو